Stop NGV!

AfriForum het reeds ’n brief aan die president gerig wat aandring daarop dat hy die NGV-wetsontwerp na die parlement terugverwys, maar ons benodig verdere steun om die openbare druk teen NGV te verhoog.

NGV gaan die ANC die alleenreg en alle mag oor gesondheidsorg in die land gee. Dit beteken dat jou gesondheidsorg dieselfde bestuur gaan word as al die ander mislukte staatsondernemings, soos byvoorbeeld Eskom, dat belasting verder verhoog gaan word en dat die gesondheidstelsel in duie gaan stort. AfriForum gaan voort om die wetsontwerp op alle moontlike maniere teen te staan.

“Ons primêre bekommernis is dat NGV waarskynlik in ’n baie duur mislukking sal ontaard wat nie die gehalte van gesondheidsorg of toeganklikheid vir die Suid-Afrikaanse bevolking sal verbeter nie. NGV sal ook die grondwetlike regte van miljoene Suid-Afrikaners skend deur hulle te dwing om staat te maak op ’n gesondheidsorgplan wat van die begin af gedoem was om te misluk en die gebruik van private alternatiewe verbied,” sê Louis Boshoff, woordvoerder vir AfriForum. Moenie toelaat laat die regering beheer oor jou gesondheid neem nie.

AfriForum het reeds geskrewe kommentaar op die NGV-wetsontwerp ingedien, maar moedig lede aan om ook individuele kommentaar in te dien aan die hand van AfriForum se uiteengesette standpunte.

“Mense het gedink beurtkrag is erg maar hierdie beleid gaan lei tot beurt-gesondheidsorg,” sê Jacques Broodryk, woordvoerder vir AfriForum. Moenie toelaat laat die staat beheer oor jou gesondheid neem nie.

AfriForum en sy lede gaan kommentaar op die Nasionale Gesondheidsversekering (NGV)-wetsontwerp indien.

’n Opsomming van AfriForum se kommentaar aan die Nasionale Raad van Provinsies oor die voorgestelde wetsontwerp oor nasionale gesondheidsversekering

AfriForum het skriftelike kommentaar aan die Nasionale Raad van Provinsies oor die voorgestelde nasionale gesondheidsversekering (NGV) voorgelê. Verskeie bekommernisse is in ons kommentaar ingesluit, wat strek van ’n tekort aan deursigtigheid tot die finansiële lewensvatbaarheid van die NGV. Hier is ’n opsomming van AfriForum se belangrikste bekommernisse oor die NGV:

• Daar is ’n tekort aan inligting: AfriForum het al voorheen aangedui dat daar nie genoeg inligting bestaan oor wat die NGV sal kos, hoe dié kostes befonds gaan word en wie die NGV gaan administreer nie.

• Die haalbaarheid daarvan is twyfelagtig: AfriForum twyfel of Suid-Afrika oor die finansiële vermoë of openbaregesondheidsinfrastruktuur beskik om die NGV te ondersteun.

• Dit is polities gemotiveer: AfriForum glo dat die NGV-voorstel meer oor politiek gaan as oor ’n werklike poging om aan die armste en kwesbaarste mense toegang tot gesondheidsorg te bied.  

• Dit sal tot ’n verdere uitvloei van kundigheid lei: AfriForum waarsku dat die skema professionele gesondheidslui uit die land sal verdryf.

• Dit hou ’n magdom burokratiese uitdagings in: AfriForum is bekommerd dat die NGV ’n omslagtige, ondoeltreffende burokrasie sal skep.

• Daar is ’n tekort aan alternatiewe stelsels: Pleks van ’n regeringsbeheerde stelsel stel AfriForum ’n mengsel van openbare en privaat gesondheidsorg voor wat doeltreffender sal wees, en verwys na voorbeelde daarvan in ander lande.

• Ekonomiese groei behoort ’n dringender prioriteit te wees: AfriForum glo dat die regering eerder moet fokus op ekonomiese groei en die verbetering van die bestaande gesondheidsorgstelsel voordat ’n program soos die NGV in werking gestel word.  

• Dit is ’n skending van grondwetlike regte: Die wetsontwerp en skema wat dit voorstaan, skend ’n verskeidenheid van grondwetlike regte, waarvan die belangrikste is die reg op gesondheidsorg, wat om die individu se reg tot waardigheid en vryheid van keuse gesentreer is.

• Dit is ’n duur mislukking: AfriForum is bevrees dat die NGV ’n duur mislukking kan wees wat in werklikheid nie gesondheidsorg in Suid-Afrika sal verbeter nie.  

Wat is Nasionale Gesondheidsversekering?

Die Nasionale Gesondheidsversekering (NGV) is ’n sentrale fonds wat die staat wil skep, wat deur die verskillende provinsiale gesondheidsdepartemente uitgevoer sal word. Die NGV-program sal deur bykomende belastinginkomste befonds word. Die publiek kan steeds aan hulle eie mediese fondse behoort, maar mediese fondse sal net gesondheidsorgbehandeling kan dek wat nie deur die NGV gelewer word nie. Die staat sal ook van die dienste van privaat mediese fasiliteite gebruik maak en sal prysbeheer oor medikasie en dienste uitoefen. Dit beteken in werklikheid dat die staat in beheer van die hele gesondheidsektor sal wees.

Die probleem met Nasionale Gesondheidsversekering

AfriForum voer aan dat die NGV net nog ’n onrealistiese en sosialistiese staatsprojek is wat die vryheid van die publiek (as verbruikers van gesondheidsorg) sal beperk en uiteindelik vernietig, en so ook die vryheid van dokters en ander gesondheidspraktisyns (as die verskaffers van gesondheidsorg). Die NGV sal die privaat gesondheidsektor vernietig, en alle dienslewering sal verlaag word tot die vlak van ons huidige openbare gesondheidsektor. Dit sal beteken dat almal in die land uiteindelik onderhewig sal wees aan swak dienslewering deur die staat as gevolg van bekostigbaarheidsoorwegings.

AfriForum beskou die NGV voorts as ’n regstreekse aanslag op die middelklas en op mediese sorg van gehalte in Suid-Afrika. Ons beskou dit ook as ’n desperate poging om te probeer vergoed vir die selfgeskepte gemors in die openbare gesondheidsorgsektor. Daar is ook te min belastingbetalers in die land om die NGV te befonds, en die ekonomie groei te stadig om die NGV volhoubaar te maak. As gevolg van ’n tekort aan mediese praktisyns, medisyne en mense om die NGV te befonds, sal mediese sorg uiteindelik duurder wees vir almal. Die implementering van die NGV sal voorts lei tot ’n ongekende uittog van opgeleide mediese beroepslui. Die Suid-Afrikaanse Mediese Vereniging het in Junie 2021 gemaan dat tot 38% van sy 12 000 lede beoog om te emigreer as die NGV ingestel word. Verder beoog nog 6% om om ander redes te emigreer, en ’n verdere 17% het gesê hulle is onseker oor emigrasie as die NGV ingestel sou word.

Die verdoemende bevindings van die Zondo-kommissie, waarin wydverspreide staatskaping onthul is, behoort genoegsame rede te wees om nie nóg ’n sektor te monopoliseer nie. Daar moet egter daarop gelet word dat die NGV op ’n veel groter skaal as ander staatsbeheerde ondernemings bestuur sal word, wat die deur oopmaak vir nóg groter mislukking en finansiële verliese. In die lig hiervan, en ondanks die regering se gebruiklike leë beloftes, is daar absoluut geen waarborg dat die NGV nie dieselfde paadjie as ander staatsbeheerde ondernemings sal volg nie. Met dit in gedagte is die NGV niks anders nie as onverantwoordelike dobbel met die gesondheidsektor, en dus met die lewens van miljoene Suid-Afrikaners.