Vullisfiasko: AfriForum se Pretoria-Wes-tak spring in om te help
Terwyl ’n onbeskermde staking in die Tshwane-metro voortwoed, is noodsaaklike dienslewering in dié munisipaliteit – soos die verwydering van vullis – so te sê tot stilstand gedwing. AfriForum se Pretoria-Wes-tak het egter op 4 September ingespring om die vullisfiasko in die Danville-gemeenskap te beredder. Taklede het vragmotors en werknemers wat vullisverwydering hanteer, op hul roete in dié gebied begelei en gehelp om asblikke leeg te maak.
Die Pretoria-Wes-tak het toegesien dat die ses vragmotors wat opgedaag het om hul plig teenoor die belastingbetalers in die Danville-gebied na te kom, hul werk veilig kon verrig. Vullisverwydering in dié buurt is drie weke gelede gestaak weens stakende munisipale werknemers se intimidasie van kontrakteurs verantwoordelik vir vullisverwydering. Verskeie vullisvragmotors is reeds tydens die staking aan die brand gesteek. Dit het volgens die Tshwane-metro daartoe gelei dat kontrakteurs hul dienste onttrek het. Die ingryping van AfriForum se Pretoria-Wes-tak het vandeesweek nie net help toesien dat vullis in dié gebied opgeneem kon word nie, maar dit het ook voorkom dat dié vullis op straat en in die veld gestort word.
“Die staking woed nog sterk en dit wek groot kommer oor die metro se vermoë om wet en orde te handhaaf. Intussen staan basiese dienste wat aan lede van die publiek gelewer moet word, heelagter in die ry. Gemeenskapslede wat reeds hul sente omdraai, moet nou nog dieper delf om self in te staan vir dienste wat die Tshwane-metro eintlik moet lewer. Die Pretoria-Wes-tak het egter met hierdie optrede gewys watter reuse-invloed selfdoen-inisiatiewe op die gemeenskap kan hê,” verduidelik Dewet Ungerer, AfriForum se koördineerder vir Groter Pretoria-Suid.
Ungerer moedig die gemeenskap aan om betrokke te raak, vir hulself te veg en die Pretoria-Wes-gemeenskap op te bou.
Raak vandag nog betrokke by dié plaaslike AfriForum-tak en stuur ’n e-pos na voorsitter.pretoria-wes@afriforumtak.co.za.
