Wraakpornografie die jongste saak wat teen Pretoria-Oos-boelie, Johnny Rockett, geopen is
Enkele dae voordat John Schuurman – oftewel Johnny Rockett – weer in die hof moet verskyn omdat hy na bewering ’n vrou aangerand het, is nóg ’n saak wat verband hou met die mishandeling van ’n vrou teen hom aanhangig gemaak. AfriForum se privaatvervolgingseenheid het Lindrie Gouws gehelp om ’n saak te open nadat Schuurman glo intieme foto’s van Gouws aan haar vriende versprei het met die doel om haar emosionele skade te berokken en te benadeel.
Hierdie sogenaamde wraakpornografiesaak is ’n eerste vir die eenheid, wat sterk standpunt ingeneem het teen alle vorme van geslagsgebaseerde geweld. Aanklagte is vandag, 23 September by die Sinoville-polisiestasie aanhangig gemaak vir die oortreding van die Wet op Films en Publikasies, oortreding van die Wet op Kubermisdade, asook crimen injuria.
Gouws sê sy het uiteindelik die ondersteuning wat nodig is om terug te veg. “Ek het besluit om standpunt teen mishandeling in te neem. Die ondersteuning van AfriForum se privaatvervolgingseenheid het die omgewing geskep wat my in staat gestel het om uiteindelik stappe teen Schuurman te neem, ná baie jare van mishandeling.”
Schuurman is Maandag terug in die Hatfield-landdroshof omdat hy na bewering sy voormalige lewensmaat, Milena Hill, aangerand het. Sy het die eenheid genader uit kommer dat haar saak nie sou voortgaan nie weens Schuurman se beweerde kontakte binne die SAPD.
In ’n ander saak waarby Schuurman betrokke was, het die eenheid Tyron Treurnich bygestaan om ’n saak van aanranding met die opset om ernstig te beseer, opsetlike saakbeskadiging en diefstal te open. Die eenheid is in besit van videomateriaal van die voorval asook verskeie beëdigde verklarings van getuies om die saak teen die verdagte te ondersteun.
Die bewerings is hoofsaaklik dat Treurnich in Augustus verlede jaar na ’n woonkompleks gelok is onder die voorwendsel om ’n kliënt se hare te sny. Nadat hy in ’n woonstel ingelaat is, is hy na ’n slaapkamer gelei. Treurnich voer aan dit was toe dat Schuurman verskyn en hom erg aangerand het en hom daarvan beskuldig dat hy van hom gesteel het.
Schuurman het vir homself ’n reputasie in die ooste van Pretoria verwerf. Adv. Gerrie Nel, hoof van AfriForum se privaatvervolgingseenheid, sê dat enige persoon wat die wet oortree aanspreeklik gehou moet word. “Een van die redes waarom AfriForum se privaatvervolgingseenheid gestig is, was om boelies te hanteer, mense wat hul magsposisies – hetsy dit politieke, finansiële of fisieke mag is – gebruik om ander te misbruik en te ondermyn. Dit is iets waarvoor die eenheid nie sal staan nie, en ons sal al hierdie sake noukeurig monitor om te verseker dat geregtigheid geskied en die gemeenskap beskerm word teen ’n individu se gewelddadige oortredings.”
Die eenheid se woordvoerder, Barry Bateman sê: “Ons het berigte ontvang van ander moontlike voorvalle van geweld wat deur Schuurman gepleeg is. Ons nooi klaers uit om hul ervarings met ons te deel met die oog daarop om te verseker dat die sake teen Schuurman behoorlik by die polisie aanhangig gemaak word, met korrek opgestelde beëdigde verklarings, vergesel van die vereiste bewyse, om ’n suksesvolle vervolging te verseker.”
“Die eenheid sal al hierdie klaers deur die proses ondersteun, tot die einde van ’n verhoor. Dit sluit in die gebruik van elke aspek van beskikbare wetgewing om te kyk na die welstand van slagoffers van misdaad, en om hulle te beskerm teen verdere viktimisering deur verdagtes,” sê Bateman.
