Afwenteling van polisiëringsmagte nou nodig om kritieke tekort aan speurders op te los

’n Tekort aan 8 594 speurders landwyd beklemtoon volgens AfriForum die dringendheid daarvan om polisiëringsmagte af te wentel na munisipale vlak. Die kommerwekkende tekort aan speurders in die Suid-Afrikaanse Polisiediens (SAPD), soos onthul deur Senzo Mchunu, minister van Polisie, dui op ’n behoefte aan ’n strategiese opknapping van die polisiëringstelsel. Volgens AfriForum sal die afwenteling van hierdie magte voorsiening daarvoor maak om speurders op dieselfde wyse as metropolisie en die beamptes in die wetstoepassingsbevorderingsprogram (LEAP) aan te stel.

Mchunu se onlangse parlementêre reaksie het die kritieke leemtes in die wetstoepassingsraamwerk uitgelig, met meer as 50 speurders wat elke maand hul posisies verlaat en dikwels poste in die privaatsektor aanvaar. Dít lei tot verdere tekorte en laat gemeenskappe kwesbaar.

Versoeke vir verbeterde werksomstandighede en dat die SAPD sy huis in orde moet kry, het op dowe ore geval. In die lig van hierdie uitdagings voer AfriForum aan dat die sentralisering van polisiedienste nie meer houdbaar is in ’n land wat met sulke ernstige tekorte en dekades van wanbestuur worstel nie. In plaas daarvan sal die oordrag van polisiëringsmagte aan plaaslike munisipaliteite meer pasgemaakte, doeltreffende en reaktiewe wetstoepassing moontlik maak. Deur speurders op munisipale vlak in diens te neem, soortgelyk aan die metropolisie en LEAP-beamptes, kan daar verseker word dat plaaslike wetstoepassingsagentskappe die nodige hulpbronne en personeel het om misdaad doeltreffend aan te pak.

Sommige van die voordele van hierdie plaaslike speureenhede sal insluit:

1. Gelokaliseerde reaksie op misdaad: Munisipaliteite is beter geposisioneer om die unieke uitdagings en behoeftes van hul gemeenskappe te verstaan. Die afwentelling van magte sal ’n meer gelokaliseerde en vinnige reaksie op misdaad moontlik maak.
2. Verbeterde gemeenskapsvertroue: Plaaslike speurders wat deur die gemeenskap in diens gestel en bestuur word, is meer geneig om vertroue en samewerking tussen wetstoepassers en inwoners te bevorder, wat noodsaaklik is vir doeltreffende misdaadvoorkoming en -oplossings.
3. Verbeterde aanspreeklikheid: Met plaaslike oorsig sal daar groter aanspreeklikheid en deursigtigheid in die prestasie en optrede van speurders wees, om te verseker dat daar in die behoeftes van die gemeenskap voorsien word.

“AfriForum doen ’n beroep op die regering van nasionale eenheid om onmiddellike stappe te doen in die rigting van die afwenteling van polisiëringsmagte. Ons doen ’n beroep op die parlement om wysigings aan die wetgewing te oorweeg wat munisipaliteite sal bemagtig om hul eie speurmagte te werf en te bestuur. Die huidige gesentraliseerde stelsel faal ons gemeenskappe, en sonder gewaagde hervorming sal die situasie net verder versleg,” sê Jacques Broodryk, AfriForum se hoofwoordvoerder vir Gemeenskapsveiligheid.
“Aangesien Suid-Afrika steeds toenemende misdaadsyfers en kwynende wetstoepassingsvermoëns ervaar, is dit noodsaaklik dat ons innoverende oplossings ondersoek wat werklike verandering teweeg kan bring. Die afwenteling van polisiëringsmagte na die munisipale vlak is nie net ’n noodsaaklike stap nie; dit is die mees praktiese en doeltreffende manier om te verseker dat ons gemeenskappe veilig is en gedien word deur ’n wetstoepassingstelsel wat werklik aan hul behoeftes voldoen,” sluit Broodryk af.