AfriForum versoek ondersoek na militante groep in Mpumalanga
Blatante korrupsie moenie Suid-Afrikaanse lewens in gevaar stel
Die onlangse onthullings in die Open Borders dokumentêre reeks wat deur AfriForum vervaardig is, tesame met die skokkende gebeure rondom die Milites Dei Security Services (MDSS) se onwettige militêre kamp in Mpumalanga, beklemtoon ’n gevaarlike vlak van onbevoegdheid en korrupsie binne die Departement van Binnelandse Sake, die Departement van Internasionale Betrekkinge en Samewerking (Dirco) en ander regeringsinstansies. In die lig hiervan vra AfriForum dus vir ’n dringende onafhanklike ondersoek na die bewerings rondom die Milites Dei -militêre kamp.
Die ontdekking van 95 Libiese burgers, wat na bewering aan die gewapende groep “Brigade 20/20” verbonde is, wat militêre opleiding by ’n onwettige fasiliteit in Witrivier ondergaan het, is ’n voorbeeld van die regering se onvermoë om Suid-Afrika se nasionale veiligheid te beskerm. Hierdie individue het die land binnegekom op veronderstelde “studievisums” wat glo onwettig deur die Suid-Afrikaanse Ambassade in Tunis uitgereik is, wat die grootskaalse korrupsie binne hierdie departemente en sy buitelandse filiaalkantore verder onderstreep.
Volgens Jacques Broodryk, AfriForum se hoofwoordvoerder vir gemeenskapsveiligheid, is die burgerregteorganisasie veral bekommerd oor Suid-Afrikaanse amptenare se oënskynlike betrokkenheid by hierdie situasie. Om bedrieglike visums uit te reik ondermyn nie net die integriteit van die land se immigrasiestelsel nie, maar hou ook ’n direkte bedreiging in vir die veiligheid en sekuriteit van Suid-Afrikaanse burgers. Die feit dat hierdie Libiese burgers met so gemak Suid-Afrika kon binnekom is ’n verdoemende voorbeeld van die regering se versuim om sy eie wette toe te pas en sy grense te beveilig.
“Ondanks die inhegtenisnemings en daaropvolgende uitsetting van hierdie individue, bevraagteken AfriForum die toereikendheid van die regering se reaksie. Die aanklagte teen die mans is onverklaarbaar teruggetrek, wat ernstige vrae laat ontstaan oor die invloed van korrupsie en die gebrek aan aanspreeklikheid binne die regstelsel,” sê Broodryk.
AfriForum eis dus ’n volledige, deursigtige en onafhanklike ondersoek na die uitreiking van hierdie bedrieglike visums en die breër mislukking van grensbeheer in Suid-Afrika. Hierdie ondersoek moet nie polities gemotiveer wees nie, maar eerder burgerregteorganisasies betrek om te verseker dat almal wat verantwoordelik is vir hierdie ernstige skending van nasionale veiligheid aanspreeklik gehou word.
Verder doen AfriForum ’n beroep op die regering om:
- Grensbeheer te verbeter: Implementeer dadelik maatreëls om Suid-Afrika se grense te beveilig en die onwettige toetrede van individue te voorkom, aangesien dit ’n bedreiging vir nasionale veiligheid is.
- Pak korrupsie: Doen ’n deeglike oudit van die regeringsdepartemente en sy buitelandse filiaalkantore om korrupsie uit te roei en te verseker dat alle immigrasieprosesse met die hoogste vlak van integriteit uitgevoer word.
- Aanspreeklikheid: Verseker dat diegene wat verantwoordelik is vir die uitreiking van bedrieglike visums en die versuim om die land se grense te beveilig aanspreeklik gehou word, insluitend deur kriminele vervolging.
Die veiligheid van Suid-Afrika en sy burgers kan nie gekompromitteer word nie. AfriForum doen ’n beroep op die regering om beslissend op te tree om die publiek se vertroue in die land se grensbeheer te herstel en burgers te beskerm teen die groeiende bedreigings wat onwettige immigrasie, korrupsie en militante groepe inhou.
