Hof hoor beskuldigde in Schalk Pienaar-moord is herhaalde oortreder
Ontstellende besonderhede oor die moordbeskuldigde Tsholofelo Joseph Motsoane se misdaadgeskiedenis het in die Mokopane-landdroshof aan die lig gekom tydens sy aansoek om borgtog. Motsoane word aangekla van die moord op die prominente Mokopane-prokureur Schalk Pienaar in 2022. Die beskuldigde staan tereg op aanklagte van moord, sameswering om moord te pleeg en ander vuurwapenverwante aanklagte en het na bewering ook die ontsnappingsvoertuig bestuur.
AfriForum se privaatvervolgingseenheid verteenwoordig die Pienaar-gesin, wat die eenheid genader het vir ondersteuning weens vertragings met die afhandeling van die saak.
Pienaar is op 19 September 2022 in sy oprit vermoor kort nadat hy by die huis gekom het. Hy is tien keer geskiet. Motsoane is in Oktober 2022 in verband met die moord gearresteer. ’n Twee verdagte is ook gearresteer en aangekla maar die klagtes teen hom is later teruggetrek.
Die staat het gister Motsoane se kriminelerekord aan die hof voorgelê. Sedert 2003 het Motsoane vonnisse uitgedien vir verskeie aparte sake van poging tot moord, roof en diefstal. Hy is ook daaraan skuldig bevind dat hy uit aanhouding ontsnap het terwyl hy in twee van hierdie sake verhoorafwagtend was.
Die staat het borgtog teëgestaan onder meer op grond daarvan dat Motsoane sou vlug en met bewyse sal peuter. Die ondersoeker, kaptein Ross Rossouw, het in ’n beëdigde verklaring wat op rekord geplaas is, gesê dat ten minste drie ander verdagtes nie opgespoor is nie en dat die moordwapen ook nog nie gevind is nie. Die staat het egter aangevoer dat die bekentenis van Motsoane wettig verkry is, sowel as ’n verklaring deur ’n getuie wat Motsoane met die beplanning van dié moord verbind. ’n Ooggetuie plaas Motsoane se motor ook op die moordtoneel.
Motsoane het die hof gevra om op borgtog vrygelaat te word as gevolg van sy beweerde swak gesondheid en dat hy nie in staat is om sonder krukke te loop nie weens ’n gebreekte been.
Die eenheid het saam met Pienaar se weduwee, Fransie, en sy dogter, Bardien, die verrigtinge bygewoon. Fransie sê dat haar oorlede man as prokureur in die strafregstelsel geglo het. “Hy het geglo dat almal die reg het om in ’n hof verhoor te word. Jy moet jou dag in die hof hê en geregtigheid moet geskied. Dit is al wat ons wil hê,” sê sy.
Volgens Fransie het die privaatvervolgingseenheid se betrokkenheid in hierdie saak ’n bietjie van haar angstigheid weggevat. “Ek weet niks gaan hom terugbring nie, ongeag hoe moeilik dit vir ons is. Dit is baie moeilik om deur hierdie proses te gaan, om elke keer die oomblik wat ek hom in my arms vasgehou het te herleef, hoe hy geskiet is en ek nie die bloed kon stop nie. Maar ek is dankbaar dat daar nou vordering is vandat AfriForum ons verteenwoordig.”
Die hof sal op Vrydag, 2 Februarie ’n besluit oor die borgtog maak.
Die verhoor is vir 22 tot 26 Julie in die Hooggeregshof in Polokwane op die rol geplaas.
