AfriForum maan SAPD om by gewelddadige betogings in te gryp
Die burgerregteorganisasie AfriForum het in reaksie op die eskalerende taxistaking sy regspan opdrag gegee om ’n aanmaningsbrief aan luitenant-generaal Fannie Masemola, die nasionale kommissaris van die Suid-Afrikaanse Polisiediens (SAPD), te rig en versoek onmiddellike ingryping om wet en orde te herstel.
Jacques Broodryk, woordvoerder van Gemeenskapsveiligheid by AfriForum, het die dringendheid van die situasie beklemtoon. “Dit is die Suid-Afrikaanse Polisiediens se grondwetlike verantwoordelikheid om wet en orde te handhaaf en om die veiligheid van landsburgers te verseker,” sê Broodryk. “Die huidige stand van sake is onaanvaarbaar en verlang onmiddellike aandag en optrede.”
Die taxistaking in Kaapstad, wat al ’n paar dae duur, het gelei tot die tragiese afsterwe van twee mense en nog drie is beseer, terwyl verskeie paaie ook versper is, wat wydverspreide ontwrigting en vrees onder inwoners van Kaapstad veroorsaak het. Die staking gaan egter onverpoosd voort, ondanks pogings tot onderhandeling en oplossing.
Verder word die gemeenskap in Pretoria gekonfronteer met diensleweringsuitdagings weens die betrokkenheid van sekere munisipale werkers by ’n onbeskermde staking. Ten spyte daarvan dat die munisipaliteit reeds begin het met regsprosedures om werkers wat deelneem aan hierdie protesaksie aan te spreek, bly die handhawing van wet en orde uiteindelik onder die jurisdiksie van die polisie.
AfriForum se aanmaningsbrief aan die SAPD is ’n oproep tot aksie wat eis dat die polisie hul pogings om die publiek te beskerm en orde te herstel, op te skerp. Die organisasie glo dat die SAPD ’n plig het om in te gryp en beslissende stappe te doen om verdere verlies van lewe en eiendom te voorkom.
“Ons kan nie net staan en toekyk terwyl ons burgers in vrees en onsekerheid leef nie. Die SAPD moet hul grondwetlike plig nakom en onmiddellike stappe doen om die veiligheid van die mense van Kaapstad te verseker,” sê Morné Mostert, bestuurder vir Plaaslike Regeringsake by AfriForum.
AfriForum is daartoe verbind om die SAPD aanspreeklik te hou en sal voortgaan om te pleit vir die regte en veiligheid van alle Suid-Afrikaners. Die organisasie doen ’n beroep op die SAPD om vinnig en beslissend op te tree om vrede en orde in Kaapstad en Pretoria te herstel.
AfriForum het ook die hulp van die organisasie se buurtwagte aan die SAPD gebied ten opsigte van hierdie twee voorvalle.
