AfriForum verwerp nuwe wetsontwerp op haatspraak binne die konteks van verergerende blatante dubbele standaarde rakende haatspraak
Die burgerregteorganisasie AfriForum het ’n skriftelike voorlegging by die Gekose Komitee oor Sekuriteit en Justisie ingedien oor die voorgestelde Wetsontwerp op die Voorkoming en Bestryding van Haatmisdade en Haatspraak. AfriForum het in 2019 en 2021 skriftelike kommentaar teen hierdie voorgestelde wetsontwerp ingedien en in 2022 ’n mondelinge voorlegging voor die Portefeuljekomitee oor Justisie en Korrektiewe Dienste gedoen waarin die organisasie se kommer oor die wetsontwerp uiteengesit is. Die wetsontwerp is nou weer oop vir openbare kommentaar.
Dit is van kardinale belang om daarop te let dat die grondwetlike standaard vir haatspraak twee kwalifiseerders het. Haatspraak sluit spraak in wat haat voorstaan wat op ras, etnisiteit, geslag of godsdiens gebaseer is, en wat aanhitsing behels om skade te berokken. Volgens die wetsontwerp is die blote aanhitsing van haat egter voldoende om as haatspraak beskou te word. Hierdie wetsontwerp water verder die grondwetlike reg op vryheid van uitdrukking af deur die definisie van “skade” uit te brei om emosionele en sosiale skade in te sluit.
AfriForum is ook bekommerd oor die verergerende dubbele standaarde wat wortel geskiet het rakende haatspraak wanneer dit kom by hofuitsprake, die regering se toepassing van wetgewing en media veroordeling. Hierdie wetsontwerp skep net verdere potensiaal vir hierdie skadelike dubbele standaarde om met groter vooroordeel en erns toegepas te word.
Die feit dat John Jeffery, adjunkminister van Justisie, haatlike en stereotiperende opmerkings oor Afrikaners gemaak het tydens ’n vergadering vroeër vanjaar van die Portefeuljekomitee oor Justisie en Korrektiewe Dienste juis oor hierdie wetsontwerp wat beweer om groepe teen hierdie tipe haatlike uitsprake te wil beskerm, is presies waarom AfriForum nie ten gunste daarvan is dat meer mag aan die regering gegee moet word om spraak te polisieer in ooreenstemming met sy duidelike dubbele standaarde nie.
Ernst van Zyl, veldtogbeampte vir strategie en inhoud by AfriForum, sê dit blyk dat werklike haatspraak toenemend goedgekeur of selfs aangemoedig word teen groepe soos rasseminderhede, Afrikaners of boere, terwyl spraak wat nie volgens grondwetlike standaarde as haatspraak kwalifiseer nie, toenemend as haatspraak behandel word wanneer dit sekere bevoorregte groepe teiken.
“AfriForum is toegewyd aan die beginsel van vryheid van uitdrukking en is ook ten gunste van wetgewing rakende werklike haatspraak in die Suid-Afrikaanse konteks. Ons kan egter nie die verdere uitbreiding van haatspraakwetgewing steun binne ’n ontstellende konteks van blatante dubbele standaarde waar simbole wat geen oproep tot geweld bevat nie, tot haatspraak verklaar word, terwyl openlike oproepe tot geweld soos die Kill the Boer-dreunsang verdra en toegelaat word.”
AfriForum moedig die publiek aan om hul name op www.haatspraak.co.za by te voeg en AfriForum ’n mandaat teen hierdie gevaarlike wetsontwerp te gee.
