Who and what is AfriForum?

AfriForum is an Afrikaans civil rights organisation that protects the rights of minority groups at national as well as provincial level, and anyone who can identify with AfriForum’s principles and objectives may join the organisation. AfriForum’s community plan focuses on mobilising communities to thus take control of their own streets and neighbourhoods again. AfriForum ensures that your constitutional and civil rights are recognised and protected at national level.

Wie en wat is AfriForum?

AfriForum is ’n Afrikaanse burgerregteorganisasie wat die regte van minderheidsgroepe op sowel nasionale as provinsiale vlak beskerm, en enigiemand wat met AfriForum se beginsels en doelstellings kan identifiseer, mag by die organisasie aansluit. AfriForum se gemeenskapsplan fokus daarop om gemeenskappe te mobiliseer om só weer beheer terug te neem oor hul eie strate en woonbuurtes. AfriForum verseker dat jou grondwetlike én burgerregte op nasionale vlak erken en beskerm word.

Mediaverklarings | Onderwys- en leierskapsprojekte Mediaverklarings

NWU troef UP in titaniese stryd van Dink of Sink-debatskompetisie vir universiteite

DeurAfriForum 30/11/202130/11/2021

In ’n opwindende woordestryd het die debatspan van die Noordwes-Universiteit (NWU) Vrydagaand die span van die Universiteit van Pretoria (UP) naelskraaps gewen in die finale rondte van AfriForum se Dink of Sink- onvoorbereide debatskompetisie vir universiteitstudente. Die tema het gehandel oor of die land ’n nuwe Grondwet benodig, of nie.

Volgens Alana Bailey, AfriForum se hoof van Kultuursake, vind die kompetisie normaalweg in die eerste helfte van die jaar plaas. Vanjaar is dit kreatief hanteer deur die spanne weekliks aanlyn teen mekaar te laat meeding. Daar is beplan om die twee finalisspanne in persoon teen mekaar te laat debatteer om die wenner te bepaal. Weens uitdagings met die deelnemers, aanbieders en beoordelaars se skedules, was dit nou eers moontlik om die eindstryd aan te bied.

“Dit was ’n voorreg om hierdie debat te beleef en te sien hoe flink die spanne met hulle woorde is. Ons wens hulle van harte geluk met hulle prestasie en sien uit daarna om hulle in die toekoms weer by debatskompetisies te verwelkom. Hulle het met vanjaar se eindstryd ’n standaard daar gestel wat moeilik getroef sal kan word,” voeg Bailey by.

“Dit is bemoedigend om te sien hoe debat van krag tot krag gaan, ten spyte van die uitdagende omstandighede van die afgelope twee jaar. Hierdie dinamiese debat het bewys dat die debat so gesond en mededingend soos altyd is en berei ’n uitnemende generasie van jong leiers vir ons land se toekoms voor,” sê Daniël Eloff, hoofbeoordelaar van die kompetisie.

Die NWU se span het bestaan uit Louis Boshoff, Reuben Coetzer, Rian Retief en Jack Coetzer. Boshoff is as die beste spreker aangewys.

Die lede van UP se span was MP Fourie, Brigitte Geyer, Cara van der Westhuizen en NJ Nel.