AfriForum eis belangrike besonderhede van presidensie oor die aard van Jacob Zuma se spesiale kwytskelding
Die burgerregteorganisasie AfriForum het vandag ’n PAIA-aansoek by die kantoor van president Cyril Ramaphosa ingedien waarin die organisasie deursigtigheid eis oor kritiese besonderhede rakende oudpresident Jacob Zuma se spesiale kwytskelding. Dít volg nadat Ramaphosa die spesiale kwytskelding van die vonnisse van duisende nie-gewelddadige gevangenes, wat Zuma ingesluit het, goedgekeur het.
Dit is belangrik om te onthou dat die Konstitusionele Hof in 2023 die uitspraak van die Hoogste Hof van Appèl bekragtig het dat die voormalige Nasionale Kommissaris van Korrektiewe Dienste Arthur Fraser se toestaan van mediese parool aan Zuma in 2021, slegs twee maande in sy 15-maande vonnis in, onwettig was.
AfriForum versoek die volgende in sy PAIA-aansoek:
- ’n Omvattende lys van alle individue wat voordeel getrek het uit die spesiale kwytskelding, insluitend hul oorspronklike vonnisse, aanklagte en die datum van vrylating.
- Gedetailleerde riglyne of kriteria wat gebruik word om te bepaal watter gevangenes die spesiale kwytskelding toegestaan is.
- Enige assesserings, verslae of studies wat gedoen is om die potensiële sosiale en sekuriteitsimpakte van die vrylating van so ’n aansienlike aantal gevangenes gelyktydig te evalueer.
- Rekords van enige konsultasies of vergaderings wat sleutelbelanghebbendes (soos gemeenskapsleiers, misdaadvoorkomingsorganisasies, ens.) betrek het wat gelei het tot die besluit van die spesiale kwytskelding.
- Vir diegene wat vrygelaat is, inligting oor enige vorige veroordelings of parooloortredings.
- Besonderhede van enige rehabilitasie- of herintegrasieprogramme wat die vrygelate gevangenes tydens hul aanhouding ondergaan het.
- Meganismes wat in plek is om die gedrag en aktiwiteite van vrygelate gevangenes te monitor of na te spoor om gemeenskapsveiligheid te verseker.
- Enige interne kommunikasie, memo’s of verslae wat die rasionaal of regverdiging vir hierdie spesifieke spesiale kwytskelding uiteensit.
- Gedetailleerde statistieke of verslae wat die verwagte teenoor werklike impak van die spesiale kwytskelding op die gevangenis toon.
Ernst van Zyl, veldtogbeampte vir strategie en inhoud by AfriForum, het gesê dat Zuma – wat geregtigheid weereens ontduik deur die goedkeuring van hierdie spesiale kwytskelding deur Ramaphosa – óf een van die gelukkigste mense in Suid-Afrika is, óf die ANC gebruik hierdie spesiale kwytskelding as ’n rookskerm om een van hul kamerade te help om geregtigheid te ontduik.
“President Ramaphosa en sy administrasie gaan voort om te bewys dat hulle nie ernstig is oor korrupsie aanpak nie. As ’n ANC-kader betrokke is, het hulle dit duidelik gemaak dat hulle elke moontlike toutjie sal trek om te verseker dat hy nie die binnekant van ’n tronksel sien nie,” sluit Van Zyl af.
