Crimen injuria-aanklagte ondersoek teen TikTokker wat valse aantygings van rassisme maak
’n TikTokker staar nou ’n kriminele ondersoek in die gesig vir haar beweerde vals en skadelike bewerings van rassisme wat teen drie jongmense in ’n reeks TikTok-plasings gemaak is. Reece Lopes (20), Milan Kruijer (20) en Jude Fraser-Grant (21) word deur AfriForum se privaatvervolgingseenheid verteenwoordig. Dié saak hou verband met ’n reeks sosialemediaplasings deur Njabulo Madlanga. Een van die plasings is al meer as twee miljoen keer gekyk.
Die eenheid het voorheen in die openbaar verklaar dat valse bewerings van rassisme net so ernstig hanteer moet word soos bona fide bewerings van sulke diskriminasie. Verskeie TikTok-video’s deur Madlanga het na bewering ’n stortvloed van aanlyn beledigings veroorsaak, insluitend doodsdreigemente wat teen die klaers gerig is. Sy word ondersoek op aanklagte van crimen injuria en strafregtelike laster.
Die Booysens-landdroshof het Maandag ’n tussentydse beskermingsbevel teen Madlanga, vermoedelik ’n regstudent aan die Universiteit van Kaapstad, toegestaan wat haar verbied om verder te teister of die hulp van ander in te roep om die klaers te teister. Dié tussentydse bevel moet nog aan haar beteken word.
Die eenheid het Dinsdag saam met Lopes en Kruijer na die Booysens-polisiestasie gegaan om bykomende, omvattende verklarings in te dien om by die saakdossier, wat in Augustus geopen is, gevoeg te word. Die Suid-Afrikaanse Polisiediens (SAPD) het die saak gesluit en aangeteken as “onopgespoor”. Die families van die klaers het die eenheid om hulp genader om te verseker dat die saak behoorlik ondersoek word en ’n volledige saakdossier aan die Nasionale Vervolgingsgesag (NVG) voorgelê word.
Volgens die verklarings wat by die SAPD ingedien is, het die kwessie op 6 Julie begin, toe die trio ’n dag uit by die Gold Reef City-temapark geniet het. Terwyl hulle in ’n ry gewag het om op een van die ritte te klim, het ’n ander groep mense ingedruk. Dit was op hierdie stadium dat Madlanga, wat in dieselfde ry gewag het, beweer het dat die trio geluide gemaak het wat ape naboots. Sy het op TikTok gegaan waar sy in ’n video aan haar volgelinge gesê het: “So, laat ek jou iets vertel, ons is in hierdie ry ja, ons is in ’n ry, by hierdie plek, Gold Reef, sal mense geluide hier maak as jy swart is , Ek sê net, aap geluide, so weet net dit.”
In ’n ander TikTok-plasing en op versoek van haar volgelinge om die vermeende rassiste te identifiseer, het Madlanga ’n video geplaas van die drie wat in die ry staan. Lopes, Kruijer en Fraser-Grant is gou deur Madlanga se volgelinge geïdentifiseer en het die teikens van ’n bose aanlyn veldtog geword. Dié video is al meer as twee miljoen keer gekyk.
Kruijer het op 9 Julie ’n boodskap aan Madlanga gestuur waarin hy die bewering ontken dat hy of sy vriende enige geluide gemaak het en verder ontken dat hulle rassisties is. Hy het haar gewaarsku dat as sy weier om die plasings te verwyder, hy ’n kriminele klag sal indien. In plaas daarvan om die plasings te verwyder, het Madlanga ’n skermgreep van Kruijer geplaas en beweer sy word geïntimideer. Die plasing het gelei tot verdere aanvalle teen die drie vriende.
Die aanhoudende sosialemedia-aanvalle en dreigemente deur direkte boodskappe het ’n groot impak op die welstand van die slagoffers gehad.
Wico Swanepoel, prokureur by die privaatvervolgingseenheid, sê die eenheid is gestig om te verseker dat daar gelykheid voor die reg is en om te verseker dat geregtigheid in alle gevalle gehandhaaf word. “Valse bewerings van rassisme moet net so ernstig as ware bewerings van rassisme behandel word. Valse bewerings hou ook ernstige implikasies in die publieke domein vir hierdie slagoffers in en daarom sal ons verseker dat geregtigheid in hierdie saak seëvier,” sê Swanepoel.
Die eenheid is daartoe verbind om die polisie te ondersteun om te verseker dat al die relevante bewyse in die dossier saamgestel word en hoop dat die NVG die regte besluit sal neem om Madlanga te vervolg.
