Hulp benodig om verdagte wat gesoek word op aanklagte van verkragting en poging tot moord op te spoor
Die Suid-Afrikaanse Polisiediens (SAPD) word toegejuig vir hul vinnige reaksie op die roof van Gautengse adjunkpolisiekommissaris, generaal-majoor Tommy Mthombeni, en die arrestasie van ’n verdagte. AfriForum se privaatvervolgingseenheid meen egter dat dieselfde nie gesê kan word van die SAPD se pogings om Mbongiseni Welcome Zwane – wat van verkragting en poging tot moord verdink word – op te spoor en in hegtenis te neem nie.
Zwane is reeds sedert Julie 2021 op die vlug, toe hy na bewering sy eks-meisie ontvoer, na ’n gastehuis geneem en haar verskeie kere verkrag het. Toe, twee maande later, het die vermeende ontvoerder en verkragter haar na bewering herhaaldelik buite haar huis geskiet – sy het oorleef. Dié aanval het gekom weke nadat die slagoffer die verkragtingsklag by die Cleveland SAPD ingedien het.
Verlede Donderdag is die Gautengse adjunkpolisiekommissaris generaal-majoor Tommy Mthombeni van sy private vuurwapen, ’n duur horlosie en verskeie ander waardevolle items beroof terwyl hy na bewering in Midrand was. Volgens die polisie is ’n verdagte binne 24 uur in hegtenis geneem. In ’n verklaring het die polisie gesê: “Die span het bestaan uit lede van misdaadintelligensie, die provinsiale Ondersoekeenheid vir Onopgeloste Sake, Johannesburg Metro K9-eenheid, Vision Tactical SIU en Tracker Connect.”
Die woordvoerder van die privaatvervolgingseenheid, Barry Bateman, bevraagteken waarom slagoffers van geslagsgebaseerde geweld nie so vinnig reaksie soos hierdie kry nie. “Hoekom is die Ondersoekeenheid vir Onopgeloste Sake nie ingespan om die vermeende verkragter en poging tot moordenaar Mbongiseni Welcome Zwane op te spoor nie?
AfriForum se privaatvervolgingseenheid verteenwoordig die slagoffer in hierdie saak ná haar voormalige werkgewer die eenheid om hulp genader het.
Sedert die skietery het die jong vrou by haar werkgewer bedank en na ’n plek van veiligheid gevlug. Die verdagte is nog nie vasgetrek nie.
“Die privaatvervolgingseenheid doen ’n beroep op die polisie om dieselfde ywer en vasberadenheid aan die dag te lê om ’n verdagte in ’n wrede saak van geslagsgebaseerde geweld op te spoor as wat hulle het om die generaal se aanvallers te arresteer. Zwane het die polisie vir 18 maande ontduik, terwyl sy vermeende slagoffer vir haar veiligheid wegkruip. Die skerp verskil in die toewysing van hulpbronne en moeite versterk die publiek se persepsie dat misdade teen vroue eenvoudig nie as ’n prioriteit geag word nie,” sê Bateman.
Enige persoon met inligting oor Zwane se ligging word versoek om die Cleveland SAPD te kontak by 011 622 5680. Alternatiewelik kan ’n e-pos aan die privaatvervolgingseenheid gestuur word by onsvervolg@afriforum.co.za.
