Konstitusionele Hof wys EFF se sesde desperate aansoek om verlof tot appèl in AfriForum-grondbesettingsaak met koste van die hand
Die Konstitusionele Hof het vandag Julius Malema en die EFF se aansoek om verlof om te appelleer teen ’n interdik wat AfriForum in 2017 verkry het, van die hand gewys. Hierdie interdik het Malema en die EFF verbied om mense aan te hits om private eiendom te betree en dit onwettig te okkupeer. Dit is die sesde verlies vir Malema en die EFF in dieselfde aangeleentheid en daar is nou geen verdere wetlike weë vir ’n sewende poging nie. Die EFF moet nou al die oorblywende koste wat hy AfriForum verskuldig is vir die afgelope ses jaar se hofgevegte in dieselfde saak, met rente betaal. Al het die EFF van die kostebevele aan AfriForum betaal, staan die huidige uitstaande bedrag steeds op ongeveer R215 000. Rente moet ook vanaf 2018 tot op datum op hierdie bedrag betaal word. Die EFF sal ook die jongste kostebevele van die Hoogste Hof van Appèl en die Konstitusionele Hof moet betaal sodra dit belas is.
Die EFF se eerste verlies was die interdik wat by verstek toegestaan is omdat Malema se prokureurs nie in 2017 in die hof opgedaag het nie. Tweedens is Malema se terugtrede-aansoek met koste van die hand gewys. Derdens het regter Mabusa van die Hooggeregshof die EFF se aansoek om verlof tot appèl van die hand gewys. Vierdens het die Konstitusionele Hof die EFF se aansoek om direkte toegang en appèl van die hand gewys. Vyfdens het die Hoogste Hof van Appèl die appèl van die hand gewys omdat daar geen vooruitsigte op sukses is nie. Nou, uiteindelik, het die Konstitusionele Hof die EFF ’n sesde en laaste verlies in hierdie aangeleentheid opgelê, wat dit nou effektief tot ’n einde bring. Dit is nou vasgestelde wet dat aanhitsing om grond te betree en grond te okkupeer ’n ernstige misdaad is en as die EFF in die toekoms hierdie misdaad pleeg, sal hulle skuldig wees aan minagting van die hof.
“Die EFF se hubris, begeerte om wetteloosheid aan te blaas en hul liefde vir ligsinnige hofgevegte het hulle uiteindelik duur te staan gekom. Die tyd vir speletjies is nou verby. Die EFF sal nou die geld moet betaal wat hulle AfriForum skuld,” sê Ernst van Zyl, hoof van Openbare Betrekkinge by AfriForum.
“Die implikasies van Malema en die EFF se intense desperaatheid, ses mislukte pogings om presies te wees, om hierdie grondbesettingsuitspraak om te keer, is ontstellend. Hoekom is die EFF so vasbeslote om wetteloosheid en misdadigheid te kan aanblaas? Miskien, omdat hierdie nederlae teen AfriForum ’n stokkie voor hul planne gesteek het,” sluit Van Zyl af.
