Klerksdorp-tak rig dringende brief aan Matlosana-munisipaliteit oor rioolbesoedeling in Van Duynstraat
Die AfriForum-tak in Klerksdorp doen ’n beroep op die Matlosana Plaaslike Munisipaliteit om die ernstige rioolbesoedeling in Van Duynstraat in die Songloed-gebied dringend op te los. Die tak het hierdie versoek op 29 Augustus in ’n brief aan die munisipaliteit gerig nadat AfriForum verantwoordelikheid aanvaar het om hierdie ernstige kwessie namens die geaffekteerde inwoners met die munisipaliteit op te neem. Rioolbesoedeling benadeel nie net die omgewing nie maar ook die gesondheid van die gemeenskap.
Hierdie AfriForum-tak het verskeie probleme op die rioolstortingsterrein opgemerk soos onverwerkte riool wat in die stormwaterstelsel gestort word en wat uiteindelik in die Schoonspruit beland. Daar is ook slote langs dele van die stormwaterpypleidings gegrawe wat rou riool blootlê. Die betonbedekking van die stormwatermangate is verwyder wat tot obstruksies en strukturele skade gelei het en ook vir die gemeenskap gevaarlik is.
Die Matlosana-munisipaliteit is toevertrou met die verskaffing van basiese sanitasiedienste aan sy inwoners. Dit sluit die versameling, verwydering, wegdoening of suiwering van menslike afval, huishoudelike afvalwater en riool van huishoudings in. Daarbenewens is die munisipaliteit verantwoordelik vir die instandhouding van bestaande infrastruktuur om te verseker dat die minimum standaarde van sanitasie en omgewingsveiligheid nagekom word. Deur hierdie rioolstorting in ’n natuurlike waterbron toe te laat, word verskeie wette deur die munisipaliteit oortree.
Inwoners in die omgewing het vir meer as twee jaar hul kommer uitgespreek oor gesondheids-, veiligheids- en omgewingsrisiko’s wat met hierdie rioolbesoedeling gepaardgaan. Ten spyte van hierdie kommer wat met munisipale amptenare geopper is, is daar geen reaksie of stappe gedoen om die kwessie te takel nie.
Gegewe die erns van die situasie het AfriForum ’n beroep tot aksie gerig. Indien daar geen reaksie binne 14 dae vanaf die datum van AfriForum se korrespondensie is nie, oftewel teen 12 September, sal dié organisasie verplig wees om verdere stappe te neem om die kwessie aan te pak. Dit onderstreep AfriForum se verbintenis om die welstand van die geaffekteerde gemeenskap te verseker en om owerhede aanspreeklik te hou.
“Die situasie in Van Duynstraat is ’n skerp herinnering aan die belangrikheid van effektiewe munisipale bestuur en infrastruktuurinstandhouding. Rioolbesoedeling bedreig nie net die omgewing nie, maar ook die gesondheid en lewensbestaan van inwoners. AfriForum se ingryping skyn ’n lig op die dringende behoefte aan optrede, nakoming van wette en die beveiliging van grondwetlike regte. Daar word gehoop dat hierdie situasie as ’n katalisator dien vir positiewe verandering, wat owerhede aanspoor om die kwessie spoedig en omvattend op te los,” sê Frans Roos, voorsitter van die AfriForum-tak in Klerksdorp.
“Hierdie situasie is onaanvaarbaar en die munisipaliteit moet tot verantwoording geroep word. Dit is tyd dat die munisipaliteit hulle werk doen en die inwoners se belange op die hart dra,” sê Alta Pretorius, AfriForum se distrikskoördineerder vir die Mooirivier.
Word deel van die oplossing: Kontak Roos by 083 378 8826 om by die Klerksdorp-tak aan te sluit.
