17 000 km in 14 ure: AfriForum-buurtwagte in Oos-, Suid- en Wes-Kaap takel gemeenskapsveiligheid met massapatrollie
AfriForum-buurtwagte in die Suidstreek, wat takke in die Oos-, Suid- en Wes-Kaap insluit, het vir 14 ure lank hul staal gewys in AfriForum se nasionale massapatrollie wat Vrydagmiddag (13 Oktober 2023) om 16:00 af geskop het. Dié aksie is in samewerking met die plaaslike Suid-Afrikaanse Polisiediens (SAPD), gemeenskapspolisiëringsforums (GPFs), sekuriteitsmaatskappye sowel as verkeers-, wetstoepassings- en verskeie ander veiligheidsinstansies aangebied.
’n Totaal van 966 AfriForum-patrolleerders en 398 patrolleerders van ander instansies het aan dié streek se patrollie deelgeneem. Die patrolleerders het ’n totaal van 17 407 km in 769 voertuie afgelê.
Tydens die patrollie is 46 insidente hanteer. Die insidente wat hanteer is, sluit onder meer in die besit van dwelms, huisbraaktoerusting en die onwettige besit van wapens sowel as bestuur onder die invloed van drank.
“Die AfriForum Suidstreek-buurtwagte sal voortdurend projekte aanpak en gereeld patrollies hou om misdaad in samewerking met die SAPD en ander veiligheidsinstansies hok te slaan en veiligheid te bevorder,” sê David Olivier, AfriForum se veiligheidspesialis vir die Suidstreek.
Raak vandag nog by AfriForum se buurtwagte betrokke. Jy kan help om jóú omgewing te beveilig: SMS “Buurtwag” na 45340 (R1).
