Who and what is AfriForum?

AfriForum is an Afrikaans civil rights organisation that protects the rights of minority groups at national as well as provincial level, and anyone who can identify with AfriForum’s principles and objectives may join the organisation. AfriForum’s community plan focuses on mobilising communities to thus take control of their own streets and neighbourhoods again. AfriForum ensures that your constitutional and civil rights are recognised and protected at national level.

Wie en wat is AfriForum?

AfriForum is ’n Afrikaanse burgerregteorganisasie wat die regte van minderheidsgroepe op sowel nasionale as provinsiale vlak beskerm, en enigiemand wat met AfriForum se beginsels en doelstellings kan identifiseer, mag by die organisasie aansluit. AfriForum se gemeenskapsplan fokus daarop om gemeenskappe te mobiliseer om só weer beheer terug te neem oor hul eie strate en woonbuurtes. AfriForum verseker dat jou grondwetlike én burgerregte op nasionale vlak erken en beskerm word.

Gemeenskapsake Mediaverklarings | Mediaverklarings

Delportshoop-tak knap dorp op

DeurAfriForum 07/07/202307/07/2023

AfriForum se Delportshoop-tak, wat op 2 April gestig is, is stelselmatig besig om momentum op te bou en het besluit om ’n projek van stapel te stuur wat op spesifieke probleemareas fokus. Hierdie aksie maak deel uit van dié tak se volhoubare skoonmaakprojek waarmee die takbestuur poog om Delportshoop weer in ’n pragdorp te verander.

Ná verskeie klagtes is daar in Julie besluit om die hoek van Pretorius- en Venterstraat, asook die substasie in Bredenkampstraat te takel. Gras by dié T-aansluiting is gesny om sig te verbeter en ’n nuwe stopteken is opgerig. Die area rondom die substasie se gras is ook gesny en skoongemaak om toeganklikheid te verbeter. Verder is die dorp se hoofingang, asook verskeie dreineringslote en kragbokse onder hande geneem. Dié projek word deur Ben Venter en sy span gelei.

“Ek waardeer die ondersteuning van die taklede en vra dat almal my en my span sal help om die skoonmaakprojek suksesvol uit te brei. Ek wil ook graag almal bedank wat skenkings gemaak het; sonder julle hulp sou die projek nie moontlik gewees het nie,” sê Venter.

Delportshoopstraat by die hoofpad is in Junie skoongemaak om sigbaarheid en sodoende veiligheid te verbeter. ’n Stopteken is opgerig, dreineringslote is skoongemaak en 43 slaggate is in Delportshoopstraat opgevul. Hierdie slaggate is opgevul danksy ’n skenking wat die tak ontvang het.

In Mei het die tak Kruger- en Buysstraat getakel en bosse verwyder om sigbaarheid by die besige kruising te verbeter. In April is daar op Hanekomstraat gefokus en altesaam 15 vragte rommel en vullis is met ’n bakkie en ’n 3 ton-sleepwa weggery.

“Dit is lekker om te sien hoe die gemeenskap hande vat om ’n verskil in die dorp te maak,” sê Werner Strauss, AfriForum se distrikskoördineerder vir die Noord-Kaap.