Who and what is AfriForum?

AfriForum is an Afrikaans civil rights organisation that protects the rights of minority groups at national as well as provincial level, and anyone who can identify with AfriForum’s principles and objectives may join the organisation. AfriForum’s community plan focuses on mobilising communities to thus take control of their own streets and neighbourhoods again. AfriForum ensures that your constitutional and civil rights are recognised and protected at national level.

Wie en wat is AfriForum?

AfriForum is ’n Afrikaanse burgerregteorganisasie wat die regte van minderheidsgroepe op sowel nasionale as provinsiale vlak beskerm, en enigiemand wat met AfriForum se beginsels en doelstellings kan identifiseer, mag by die organisasie aansluit. AfriForum se gemeenskapsplan fokus daarop om gemeenskappe te mobiliseer om só weer beheer terug te neem oor hul eie strate en woonbuurtes. AfriForum verseker dat jou grondwetlike én burgerregte op nasionale vlak erken en beskerm word.

Gemeenskap doen wéér regering se werk en verwyder sélf 1 623 ton waterslaai uit Vaalrivier

AfriForum het op 3 Februarie saam met verskeie ander organisasies, ondernemings en gemeenskapslede meer as 1 623 ton waterslaai uit die Vaalrivier verwyder. Dít terwyl die Departement van Water en Sanitasie (DWS) en die Departement van Bosbou, Visserye en Omgewing steeds ná byna ’n maand nog niks aan dié indringerplant gedoen het nie.

Ongeveer 50 vrywilligers het met hul hande die plante uit die water geskep en meer as 15 bote en jetski’s het die waterslaai na vier verskillende uithaalpunte gestoot. Sewe vragmotors het reggestaan om die waterslaai weg te ry en daar is elke uur vier vragte vol verwyder.

“Ons as gemeenskap is eintlik nou besig om werk te doen wat die regering se verantwoordelikheid is. Dit is vir ons duidelik dat die regering nie omgee vir ons skaarste hulpbron nie en eerder sal tyd bestee om vergaderings te hou as om daadwerklik iets aan die probleem te doen. Ons kan nie net in vergaderings sit terwyl die probleme daar buite vererger nie,” sê Jaco Grobbelaar, AfriForum se streekshoof vir die sentraalstreek.

Ondernemings en gemeenskapslede het al op 28 Januarie begin om waterslaai uit te haal – 70 ton is tóé verwyder. “Ons sal aanhou met dié projek totdat ons rivier skoon is. Mense skenk fondse wat gebruik sal word om te kyk na volhoubare oplossings om die Vaalrivier te red. Dit help nie om die regering, wat reeds op verskeie vlakke misluk het, te vra om in te gryp voor ons ekostelsel verder beskadig word nie,” sê Grobbelaar voorts.

Volgens Lambert de Klerk, AfriForum se bestuurder vir Omgewingsake, was dié aksie ’n uitstekende voorbeeld van die sukses wat behaal kan word en die verskil wat mense kan maak as hulle saam werk. “Die gemeenskap stel vir ons ’n goeie voorbeeld van wat ons kan behaal as ons saamwerk. As dit nie vir die vinnige optrede en bereidwilligheid van die gemeenskap was nie, sou die rivier al baie erger gelyk het en kon dit maklik ontaard het in iets soortgelyk aan die hiasinte-krisis in die Hartbeespoortdam.”

Lede van die publiek, ondernemings en organisasies wat wil betrokke raak by dié projek kan ’n donasie maak wat sal help om hierdie projek te befonds.