NERSA hou die elektrisiteitsbedryf in duister oor beurtkragpraktyke
Die burgerregteorganisasie AfriForum veroordeel die onlangse standpunt wat die Nasionale Energiereguleerder van Suid-Afrika (NERSA) oor Frankfort se elektrisiteitskrisis ingeneem het, ten sterkste. Die voortdurende dispuut rakende Rural Maintenance – die maatskappy wat verantwoordelik is vir die bestuur van die elektrifiseringsnetwerk in Frankfort en hul implementering van sonkrag-PV-stelsels om die gebied van krag te voorsien – beklemtoon die behoefte aan ’n gebalanseerde en vooruitdenkende benadering van regulatoriese owerhede.
Hierdie verwikkeling kom ná NERSA ’n brief aan die partye wat by die dispuut betrokke is, gestuur het waarin die mening uitgespreek word dat die voortgesette bemiddelingsproses as nutteloos geag word omdat sekere sonkrag-PV-aanlegte nie op NERSA se amptelike webwerf geregistreer is nie. Gegewe die kritieke aard van die omstandighede, behoort NERSA ’n omvattende verduideliking van sy perspektief op die saak te verskaf en die inisiatief te neem om ’n bemiddelingsproses te fasiliteer wat daarop gemik is om die elektrisiteitsbedryf in Suid-Afrika te verbeter.
“NERSA se primêre mandaat is om ’n robuuste en volhoubare elektrisiteitsektor te bevorder wat alle Suid-Afrikaners bevoordeel. Ongelukkig het NERSA konsekwent tekort geskiet om hierdie mandaat te vervul – wat ons nasie laat worstel met ’n energiekrisis en ongebreidelde wanbestuur binne Eskom. Die huidige trajek dui daarop dat NERSA Suid-Afrikaners nie net letterlik in die duister hou nie, maar figuurlik, deur gemeenskapsgedrewe inisiatiewe oor die hoof te sien wat ’n deurslaggewende rol kan speel om beurtkrag te verlig en Eskom se onstuimigheid op te los,” sê Morné Mostert, bestuurder van Plaaslikeregeringsake by AfriForum.
Terwyl NERSA die gesag het om die energiesektor te reguleer en toesig te hou, wek die energiereguleerder se hantering van die Frankfort-situasie ernstige kommer oor sy verbintenis tot die aanneming van innoverende oplossings wat die spanning op die nasionale kragnetwerk kan verlig. AfriForum is diep bekommerd oor NERSA se oënskynlike onwilligheid om gemeenskapsgeleide inisiatiewe te aanvaar – soos die aanvaarding van sonkrag-PV-stelsels in streke soos Frankfort – wat sy plig om die land se energiesekerheid te verseker, ondermyn.
“Dit is ontmoedigend om NERSA se oënskynlike prioritisering van politieke affiliasies bo die nakoming van sy wetgewende verantwoordelikhede waar te neem. Die gebrek aan ondersteuning vir gemeenskapsgedrewe oplossings onderstreep ’n onwilligheid om by ontwikkelende energiedinamika aan te pas en lewensvatbare alternatiewe buite tradisionele energiebronne te verken,” gaan Mostert voort.
Volgens Johan Kruger, bestuurder van AfriForum Energie, sal die geskiedenis NERSA nie vriendelik beoordeel as die energiereguleerder voortgaan met hierdie belemmerende gedrag waar gemeenskappe duidelike en werkbare oplossings vir die elektrisiteitskrisis het nie. “Gemeenskappe sal energie-onafhanklik word, en ons by AfriForum Energie bring ons kant om gemeenskappe by te staan om dit te doen. Hierdie golf is onstuitbaar, en NERSA kan óf besluit om ’n konstruktiewe rol te speel in die uitvoering van sy mandaat óf weggevee word en irrelevant raak,” sê Kruger.
AfriForum doen ’n dringende beroep op NERSA om sy benadering tot die Frankfort-elektrisiteitsituasie te heroorweeg en aktief met belanghebbendes, insluitend plaaslike gemeenskappe en innoverende energieverskaffers, te skakel. Deur ’n atmosfeer van samewerking te kweek en progressiewe oplossings te omhels, kan NERSA aansienlik bydra om ’n volhoubare en veerkragtige energietoekoms vir elke Suid-Afrikaner te verseker.
