Bykomende strafregtelike klagtes teen die Spar-groep se topbestuur ingedien
Nog twee Spar-topbestuurlede staan tereg op moontlike aanklagte van bedrog en meineed vir hul betrokkenheid by die beweerde onwettige oorname van Spar-supermarkte wat deur die Giannacopoulos-groep besit en bedryf word. Vyf senior bestuurslede is nou betrek by hierdie brutale korporatiewe slenter om ’n familiebesigheid te vernietig.
AfriForum se privaatvervolgingseenheid het in Desember verlede jaar Chris Giannacopoulos en sy gesin se groep maatskappye gehelp om kriminele klagtes van bedrog en meineed teen topbestuurlede in Gauteng in te dien. Nou het Harry Giannacopoulos ook ’n kriminele klag in KwaZulu-Natal ingedien. Die saak is op Woensdag 29 Maart by die Pietermaritzburg-polisiestasie geopen.
Daar word beweer dat die Spar-groep, deur die groep se topbestuurslede, in 2019 valslik in beëdigde verklarings beweer het dat maatskappye in die Giannacopoulos-groep die Spar-groep geld skuld om sodoende die howe te oortuig om die Spar-groep beheer te gee oor die supermarkte wat deur die familie se maatskappye besit word. Hierdie beweerde wanvoorstellings is deur dieselfde hooggeregshowe bevestig toe die Giannacopoulos-groep die onregmatige oornamebod suksesvol betwis het.
Die twee geïmpliseerde partye in die Gauteng-saak is Desmond Borrageiro, Spar se besturende direkteur, en Brett Botten, uitvoerende hoof van Spar. Borrageiro en Botten het albei in 2019 beëdigde verklarings in hierdie saak ingedien. Die voormalige voorsitter van die Spar-groep, Graham O’Conner, het balanssertifikate ter ondersteuning van die dagvaardings onderteken. Die beweerde wanvoorstellings – toegeskryf aan onkunde deur hul regspan – is deur sommige van die verdagtes erken en beskryf as ’n “eerlike en ongelukkige fout”.
Nou, in die KwaZulu-Natal-saak, is Max Oliva, uitvoerende hoof van Spar, Martin Conradie, Spar se menslikehulpbrondirekteur, en O’conner as verdagtes in ’n soortgelyke skema in dié provinsie geïdentifiseer. Die sake is in afsonderlike provinsies aanhangig gemaak vanweë die jurisdiksie van die winkels wat geraak is.
“Spar het krimineel en oneties teen my familie opgetree, en ons wil hê geregtigheid moet geskied,” het Harry Giannacopoulos buite die Pietermaritzburg-polisiestasie gesê.
“Ons is deur die Giannacopoulos-groep genader vanweë die vaardighede en kundigheid wat ons bied om hierdie saak te hanteer wat as korporatiewe afknouery beskou kan word. Die impak van die beweerde valse verklarings en wanvoorstellings in hofstukke was onmeetbaar, nie net finansieel nie, maar ook emosioneel. Ons is gevra om die saak te monitor en om private vervolging te oorweeg sou die Nasionale Vervolgingsgesag versuim om te vervolg,” het adv. Gerrie Nel, hoof van AfriForum se privaatvervolgingseenheid, gesê.
Die Giannacopolous-groep se prokureur in hierdie saak, Mary Erlank, is verlig oor die hierdie mylpaal wat bereik is in die uitgerekte stryd teen die Spar-groep. “Dit was ’n lang pad van litigasie, en deur dit alles het die Giannacopoulos-familie nooit fokus verloor van hul kernwaardes en beginsels in besigheid nie, en het hulself met integriteit gehandhaaf en as ’n eenheid opgetree. ’n Merkwaardige familie wat vasberadenheid en uithouvermoë getoon het,” het sy gesê.
